8 Noyabr Azərbaycan tarixinin ən şanlı, ən qürurlu günlərindən biridir. Bu gün 2020-ci ildə baş verən Vətən müharibəsində əldə etdiyimiz böyük Qələbənin, dövlətimizin gücünün, xalqımızın birliyinin və qəhrəman oğul və qızlarımızın rəşadətinin rəmzidir. 44 günlük Vətən müharibəsində Azərbaycan Ordusu Ali Baş Komandan İlham Əliyevin rəhbərliyi ilə illərlə işğal altında olan torpaqlarımızı azad etdi və 8 Noyabrda qədim Şuşa şəhərinin azad olunması ilə qələbəmizi tarixə həkk etdik.
Şuşanın azad edilməsi Vətən müharibəsinin gedişində dönüş nöqtəsi oldu. Bu hadisə təkcə hərbi baxımdan deyil, həm də mənəvi baxımdan böyük əhəmiyyət daşıyırdı. Çünki Şuşa təkcə bir şəhər deyil – Azərbaycan mədəniyyətinin, musiqisinin, poeziyasının beşiyidir. Üzeyir Hacıbəyli, Bülbül, Xurşidbanu Natəvan kimi görkəmli şəxsiyyətlərin doğulduğu bu torpağın azadlığı bütün xalqımıza sonsuz sevinc və qürur gətirdi.
Zəfər Günü bizə bir daha göstərdi ki, xalq bir olarsa, ordu güclü olarsa, ədalət öz yerini tapar. Azərbaycanın igid əsgər və zabitləri, şəhidlərimiz və qazilərimiz bu qələbənin memarlarıdır. Onların fədakarlığı, Vətənə sevgisi və mübariz ruhu gələcək nəsillərə örnək olacaq. Hər bir şəhidimizin qanı torpağımıza səpələnmiş müqəddəs xatirə, azadlıq və suverenliyimizin təməlidir.
Bu gün 8 Noyabr – Zəfər Günü münasibətilə ölkəmizin hər yerində bayram ab-havası hökm sürür. Dövlət qurumlarında, məktəblərdə, ali təhsil müəssisələrində, hərbi hissələrdə və bütün şəhər və kəndlərdə Zəfərimizin şərəfinə tədbirlər keçirilir, şəhidlərin ruhu yad olunur. Bu gün biz yalnız bir xalq kimi deyil, həm də qalib bir millət kimi başımızı dik tuturuq.
Zəfər Günü bizə həm də məsuliyyət aşılayır – bu Qələbəni qorumaq, Vətənimizi daha da gücləndirmək, şəhidlərimizin ruhuna layiq olmaq hər birimizin borcudur. Qazanılan bu tarixi uğur gələcək nəsillərə milli birlik, dövlətçilik və azərbaycançılıq ideyalarının ən parlaq nümunəsi kimi ötürüləcək.
Yaşasın Azərbaycan! Yaşasın Qalib Azərbaycan Ordusu! Qarabağ Azərbaycandır!
Pərviz Həsənov,
YAP-ın gənc fəalı
