Aprelin 22-də Bakıda Azərbaycan Respublikasının Prezidenti İlham Əliyev ilə Latviya Respublikasının Prezidenti Edqars Rinkeviçs arasında keçirilən görüş iki ölkə münasibətlərində mühüm hadisə kimi yadda qaldı. Görüşdən sonra dövlət başçıları mətbuata bəyanatlarla çıxış edərək əməkdaşlığın hazırkı vəziyyəti və gələcək perspektivləri barədə fikirlərini bölüşdülər.
Prezident İlham Əliyev çıxışında Latviya Prezidentini Azərbaycanda salamlamaqdan məmnunluğunu ifadə edərək bu səfərin ikitərəfli əlaqələrin inkişafına yeni təkan verəcəyini vurğuladı. Dövlət başçısı qeyd etdi ki, tərəflər həm təkbətək, həm də nümayəndə heyətlərinin iştirakı ilə keçirilən görüşlərdə ikitərəfli gündəliyin müxtəlif istiqamətlərini və beynəlxalq məsələləri ətraflı müzakirə ediblər.
Prezident çıxışında xatırlatdı ki, doqquz il əvvəl imzalanmış Strateji Tərəfdaşlıq haqqında Bəyannamə Azərbaycan-Latviya münasibətlərinin hüquqi əsasını formalaşdırıb və bu çərçivə əməkdaşlığın yüksək səviyyədə inkişafına imkan yaradıb. Onun sözlərinə görə, son illərdə bu baza üzərində müxtəlif sahələrdə qarşılıqlı fəaliyyət genişlənib.
Əməkdaşlığın iqtisadi istiqamətinə toxunan Prezident İlham Əliyev vurğuladı ki, bir həftə əvvəl Şuşada Birgə Hökumətlərarası Komissiyanın iclası keçirilib və perspektivli planlar müzakirə olunub. Bakıda keçirilən biznes-forumun da qarşılıqlı sərmayələrin artırılması, birgə istehsalın təşkili və işgüzar əlaqələrin genişləndirilməsi baxımından mühüm rol oynayacağı bildirilib. Prezident mövcud ticarət dövriyyəsinin daha da artırılması üçün böyük potensial olduğunu qeyd edib.
Dövlət başçısı birbaşa uçuşların təşkili məsələsinin də gündəmdə olduğunu vurğulayaraq bunun həm iqtisadi əlaqələrə, həm də insanlararası münasibətlərə müsbət təsir göstərə biləcəyini deyib. Təhsil sahəsində əməkdaşlıq da diqqət mərkəzində olub. Prezident qeyd edib ki, Latviyada 450-dən çox azərbaycanlı tələbənin təhsil alması ölkələr arasında humanitar əlaqələrin gücləndiyini göstərir.
Bəyanatda regional təhlükəsizlik məsələləri də xüsusi yer tutub. Prezident İlham Əliyev Cənubi Qafqazda sülh gündəliyi, xüsusilə Azərbaycan-Ermənistan münasibətlərində son dövrdə müşahidə olunan müsbət dinamika barədə Latviya Prezidentinə məlumat verdiyini bildirib.
Çıxışının sonunda Prezident İlham Əliyev Azərbaycan-Latviya münasibətlərinin möhkəm təməl üzərində qurulduğunu, bu münasibətlərdə dövlət başçıları arasında şəxsi etimad və dostluğun da mühüm rol oynadığını bildirib. O, Latviya Prezidentinin səfərinin ikitərəfli əməkdaşlıq tarixində yeni mərhələ açacağına əminliyini ifadə edib.
Beləliklə, aprelin 22-də Bakıda səslənən mesajlar göstərdi ki, Azərbaycan və Latviya siyasi dialoq, iqtisadi əməkdaşlıq, regional təhlükəsizlik və humanitar əlaqələr sahəsində tərəfdaşlığı daha da dərinləşdirmək niyyətindədirlər. Bu səfər iki dost ölkə arasında münasibətlərin gələcək inkişafı üçün mühüm zəmin formalaşdırır.
Mirsadıq Səməndərli,
Yeni Azərbaycan Partiyası, məsləhətçi
