Cəbrayılın gələcəyini müəyyən edən əsas amillərdən biri yeni nəsildir. İşğal illərində Cəbrayıl sakinlərinin övladlarının böyük hissəsi doğma şəhər və kəndləri görmədən böyüyüb. Buna görə qayıdış prosesi gənclər üçün həm yeni yaşayış imkanları, həm də ailələrinin tarixi məkanı ilə real əlaqənin qurulması deməkdir.
Yeni məktəbin istifadəyə verilməsi bu baxımdan xüsusi əhəmiyyət daşıyır. 2024-cü ilin oktyabrında Cəbrayıl şəhərində Mehdi Mehdizadə adına tam orta məktəbin açılışı keçirilib və yeni yaşayış məhəlləsində uşaqların təhsil alması üçün imkan yaradılıb.
Məktəb yeni sosial mühitin əsas institutlarından biridir. Burada uşaqlar yalnız bilik əldə etmir, həm də öz aralarında sosial münasibətlər qurur, şəhərin yeni həyatında iştirak etməyə başlayırlar. Bu proses Cəbrayılın gələcək ictimai strukturunun formalaşmasına təsir edən amillərdən biridir.
Gənclərin doğma yurdda qalması üçün təhsil imkanları ilə yanaşı məşğulluq perspektivləri də mühümdür. Sənaye parkı, istehsal müəssisələri, kənd təsərrüfatı, xidmət sektoru və dövlət müəssisələri gələcəkdə əmək bazarının əsas istiqamətlərini təşkil edə bilər.
Beləliklə, Cəbrayılın yeni nəsli yalnız qayıdış prosesinin iştirakçısı deyil, həm də şəhərin gələcək sosial-iqtisadi inkişafının əsas resursudur. Təhsil, peşə hazırlığı, məşğulluq və ictimai iştirak imkanlarının genişləndirilməsi Cəbrayılın uzunmüddətli inkişafının mühüm şərtlərindən biri olaraq qalır.
Asif Bayramov,
YAP Nizami rayon təşkilatının fəal üzvü
