Dövlətçilik irsi yalnız tarixi hadisələrin və siyasi qərarların məcmusu deyil, həm də gələcək nəsillərin inkişafına istiqamət verən ideya və prinsiplər sistemidir. Azərbaycan Respublikasının müasir konstitusion quruluşunun formalaşmasında Ümummilli Lider Heydər Əliyevin siyasi fəaliyyəti xüsusi əhəmiyyət daşıyır. Onun dövlətçilik fəlsəfəsi milli maraqların qorunması, siyasi sabitliyin təmin olunması və hüquqi institutların möhkəmləndirilməsi prinsiplərinə əsaslanırdı.
Heydər Əliyevin 1978-ci ildə Azərbaycan dilinin dövlət dili kimi Konstitusiyada təsbit edilməsinə nail olması onun milli maraqlara bağlılığının mühüm göstəricisidir. Həmin dövrdə atılmış bu addım Azərbaycan xalqının milli kimliyinin qorunmasına və dilin hüquqi statusunun möhkəmləndirilməsinə xidmət etdi. Bu hadisə sonradan müstəqil dövlətin konstitusion inkişafında mühüm tarixi əsaslardan biri kimi qiymətləndirildi.
1990-cı illərdə ölkədə yaranmış mürəkkəb siyasi şəraitdə Heydər Əliyevin rəhbərliyi ilə dövlət institutlarının yenidən qurulması və müstəqilliyin hüquqi əsaslarının möhkəmləndirilməsi istiqamətində mühüm işlər görüldü. 1995-ci ildə qəbul edilən Konstitusiya həmin siyasətin ən mühüm nəticələrindən biri oldu. Əsas Qanun müstəqil Azərbaycanın siyasi sistemini, hüquqi dövlət modelini və vətəndaş hüquqlarının müdafiəsi mexanizmlərini müəyyənləşdirdi.
Prezident İlham Əliyevin rəhbərliyi ilə həyata keçirilən dövlət siyasəti Heydər Əliyevin müəyyən etdiyi strateji dövlətçilik xəttinin yeni dövrün tələblərinə uyğun inkişaf etdirilməsinə əsaslanır. İqtisadiyyatın şaxələndirilməsi, müdafiə qabiliyyətinin gücləndirilməsi, hüquqi institutların təkmilləşdirilməsi və beynəlxalq mövqelərin möhkəmləndirilməsi bu siyasətin əsas istiqamətlərindəndir. Azərbaycanın ərazi bütövlüyünün və suverenliyinin bərpası isə dövlətçilik tarixində mühüm tarixi nailiyyət kimi xüsusi yer tutur.
Heydər Əliyevin siyasi irsi müasir Azərbaycanın dövlətçilik modelinin formalaşmasında mühüm ideoloji və hüquqi baza olaraq qalır. Konstitusiyanın qorunması, qanunun aliliyinin təmin edilməsi, milli maraqlara sədaqət və dövlət müstəqilliyinin möhkəmləndirilməsi bu irsin əsas prinsipləridir. Gələcək nəsillərin həmin dəyərləri mənimsəməsi Azərbaycanın davamlı inkişafı və güclü dövlət kimi mövqeyinin qorunması baxımından mühüm əhəmiyyət daşıyır.
Ülkər Məmmədova,
YAP Nizami rayon təşkilatının “Azər Manafov küçəsi, 130” ərazi partiya təşkilatının sədr müavini
