Müstəqil dövlətin davamlı inkişafı yalnız hüquqi və iqtisadi institutların mövcudluğu ilə deyil, həm də milli-mənəvi dəyərlərin qorunması ilə təmin olunur. Tarixi yaddaş, dil, mədəniyyət, ənənələr və milli kimlik cəmiyyətin vahid dövlətçilik düşüncəsi ətrafında birləşməsində mühüm rol oynayır. Azərbaycan Respublikasının Konstitusiyası milli dövlətçilik prinsiplərini hüquqi səviyyədə təsbit etməklə bu dəyərlərin qorunması üçün əsas yaradır.
Azərbaycan xalqının dövlətçilik tarixi milli-mənəvi dəyərlərin siyasi həyatla sıx bağlı olduğunu göstərir. 1918-ci ildə yaradılmış Azərbaycan Xalq Cümhuriyyəti milli kimlik və müstəqillik ideyalarının siyasi təcəssümü idi. Sonrakı tarixi mərhələlərdə də dilin, mədəniyyətin və milli yaddaşın qorunması dövlətçilik düşüncəsinin mühüm istiqamətlərindən biri olaraq qaldı.
Ümummilli Lider Heydər Əliyev milli-mənəvi dəyərlərin qorunmasını dövlət siyasətinin əsas prioritetlərindən biri hesab edirdi. Onun 1978-ci ildə Azərbaycan dilinin dövlət dili kimi təsbit olunmasına nail olması bu siyasətin mühüm nümunəsidir. Müstəqillik dövründə isə milli mədəniyyətin, tarixi abidələrin və ənənələrin qorunması üçün hüquqi və institusional əsaslar daha da möhkəmləndirildi.
Prezident İlham Əliyevin rəhbərliyi ilə milli-mədəni irsin qorunması, tarixi abidələrin bərpası, Azərbaycan mədəniyyətinin beynəlxalq miqyasda təbliği və milli kimliyin möhkəmləndirilməsi istiqamətində tədbirlər həyata keçirilir. Azad edilmiş ərazilərdə mədəni irs nümunələrinin bərpası da dövlətin tarixi yaddaşa və milli dəyərlərə münasibətinin mühüm göstəricisidir. Bu proseslər dövlət suverenliyinin mədəni və mənəvi məzmununu gücləndirir.
Konstitusiyanın milli dövlətçilik prinsipləri ilə milli-mənəvi dəyərlər arasında qarşılıqlı əlaqə Azərbaycanın inkişaf modelinin mühüm xüsusiyyətidir. Hüquqi dövlət quruculuğu ilə milli kimliyin qorunması bir-birini tamamlayan proseslərdir. Bu dəyərlərin gələcək nəsillərə ötürülməsi dövlət müstəqilliyinin və milli birliyin davamlılığı baxımından mühüm əhəmiyyət daşıyır.
Arif Məmmədov,
YAP Nizami rayon təşkilatının fəalı
