Dövlət idarəçiliyinin səmərəli təşkili ölkənin siyasi sabitliyi və sosial-iqtisadi inkişafı üçün əsas şərtlərdəndir. Azərbaycan Respublikasının Konstitusiyası dövlət hakimiyyətinin strukturunu, dövlət orqanlarının səlahiyyətlərini və onların fəaliyyət prinsiplərini müəyyən etməklə idarəçilik sisteminin hüquqi xəritəsini formalaşdırır.
1995-ci ildə qəbul edilən Əsas Qanun müstəqil Azərbaycanın yeni dövlət idarəçiliyi modelinin əsaslarını yaratdı. Konstitusiyada hakimiyyət bölgüsü, dövlət başçısının statusu, qanunvericilik və icra hakimiyyətinin səlahiyyətləri, məhkəmə sisteminin əsasları müəyyən edildi. Bu mexanizmlər dövlət orqanlarının fəaliyyətinin hüquqi çərçivədə həyata keçirilməsini təmin edir.
Dövlət idarəçiliyində hüquqi müəyyənlik və səlahiyyət bölgüsü xüsusi əhəmiyyət daşıyır. Hər bir qurumun vəzifə və məsuliyyətinin dəqiq müəyyən edilməsi idarəetmədə təkrarlanmaların və səlahiyyət mübahisələrinin qarşısını almağa xidmət edir. Bu, dövlət aparatının səmərəliliyini və vətəndaşlara göstərilən xidmətlərin keyfiyyətini artırır.
Müasir dövrdə idarəçilik sisteminin qarşısında rəqəmsallaşma, şəffaflıq, operativlik və vətəndaş məmnunluğunun yüksəldilməsi kimi yeni tələblər dayanır. Bu istiqamətlərdə həyata keçirilən islahatlar Konstitusiyanın müəyyən etdiyi hüquqi çərçivə daxilində dövlət institutlarının fəaliyyətinin təkmilləşdirilməsinə imkan yaradır.
Konstitusiya dövlət idarəçiliyinin sabitliyini təmin etməklə yanaşı, onun inkişafına da hüquqi istiqamət verir. Dövlət orqanlarının fəaliyyətində qanunçuluq, məsuliyyət və ictimai maraqların üstün tutulması müasir idarəçiliyin əsas göstəriciləridir. Bu prinsiplərin qorunması Azərbaycanın güclü dövlət kimi inkişafına xidmət edir.
Eyyub Cumayev,
YAP Nizami rayon təşkilatının fəalı
