Azərbaycan xalqının tarixi taleyində mühüm əhəmiyyət kəsb edən günlərdən biri də 15 İyun – Milli Qurtuluş Günüdür. Bu gün, ölkəmizin müstəqilliyinin qorunub saxlanmasında və dövlətçiliyimizin bərpasında xüsusi rol oynamış bir dönüş nöqtəsidir. 1993-cü ilin 15 iyun tarixində Ümummilli lider Heydər Əliyevin Azərbaycan Ali Sovetinin sədri seçilməsi ilə ölkədə baş verən siyasi xaos və vətəndaş qarşıdurmasına son qoyulmağa başlandı. 1991-ci ildə müstəqilliyini bərpa edən Azərbaycan, müstəqil dövlət quruculuğunun ilk illərində ciddi daxili və xarici çətinliklərlə qarşı-qarşıya qaldı. Qarabağ müharibəsinin davam etdiyi, iqtisadi çətinliklərin dərinləşdiyi və dövlət idarəçiliyində xaosun hökm sürdüyü bir dövrdə ölkə tam bir böhran içində idi. 1993-cü ilin iyun ayında Gəncə hadisələri ilə siyasi böhran daha da kəskinləşdi və vətəndaş müharibəsi təhlükəsi yarandı. Belə bir kritik zamanda xalqın təkidi və tələbi ilə Naxçıvan Muxtar Respublikası Ali Məclisinin sədri olan Heydər Əliyev Bakıya dəvət olundu. 15 iyun 1993-cü ildə o, Azərbaycan Ali Sovetinin sədri seçildi və faktiki olaraq ölkə rəhbərliyinə qayıtdı. Bu tarix sonradan Milli Qurtuluş Günü kimi tarixə yazıldı. Heydər Əliyevin siyasi hakimiyyətə qayıdışı ilə Azərbaycanda sabitlik bərqərar oldu, dövlətçiliyin əsasları möhkəmləndirildi və vətəndaş qarşıdurmasının qarşısı alındı. 1994-cü ildə imzalanmış “Əsrin müqaviləsi” ölkə iqtisadiyyatında dönüş nöqtəsi oldu. Xarici siyasətdə balanslı münasibətlər qurulmağa başlandı, ordu quruculuğu və hüquqi dövlətin təməli atıldı. 15 İyun təkcə siyasi böhrandan çıxış deyil, həm də milli birliyin, vətəndaş həmrəyliyinin və dövlətçilik ənənələrinin dirçəlişidir. Bu gün Azərbaycan tarixində bir xilas, bir qurtuluş simvolu kimi qeyd olunur. Məhz bu gündən sonra ölkəmiz sabitlik və inkişaf yoluna qədəm qoydu. 15 İyun – Milli Qurtuluş Günü Azərbaycan xalqının yaddaşında birliyin, müdrikliyin və siyasi iradənin təntənəsi kimi yaşayır. Bu günün tarixi dərsləri gələcək nəsillərə vətənə sədaqət, dövlətə bağlılıq və liderin rolu barədə dərin anlayış verir. Hər il bu gün xüsusi hörmətlə qeyd olunur və xalqımızın gələcəyə inamını gücləndirir.
Məmmədova Nərmin,
Yeni Azərbaycan Partiyası, məsləhətçi
