20 Sentyabr Azərbaycan xalqının yaddaşında artıq xüsusi tarixi məna daşıyan günlərdən biridir. 2023-cü il sentyabrın 20-də ölkənin bütün ərazisində dövlət suverenliyinin bərpa edilməsi bu tarixin əsas məzmununu müəyyənləşdirib. 2024-cü ildə Prezident İlham Əliyevin sərəncamı ilə 20 Sentyabrın Dövlət Suverenliyi Günü kimi təsis edilməsi həmin hadisənin dövlətçilik tariximizdəki əhəmiyyətini təsdiqləyib. Eyni tarix Xankəndi, Xocalı, Xocavənd və Ağdərə şəhərləri günü kimi də müəyyən olunub.
Bu tarix bir tərəfdən keçmişə nəzər salmağa, digər tərəfdən isə gələcəyə baxmağa imkan verir. Keçmiş bizə dövlət suverenliyinin və ərazi bütövlüyünün hansı tarixi sınaqlardan keçərək bərpa edildiyini göstərir. Gələcək isə bu tarixi nəticənin hansı quruculuq və inkişaf layihələri ilə möhkəmləndiriləcəyindən asılıdır. Qarabağda aparılan bərpa işləri məhz bu ikinci istiqamətin əsasını təşkil edir. Dövlət artıq azad edilmiş ərazilərdə yalnız mövcud infrastrukturu bərpa etmir, yeni şəhər və yaşayış məkanları formalaşdırır.
Xankəndi, Xocalı, Xocavənd və Ağdərə bu baxımdan xüsusi məna daşıyır. Onların hər biri Azərbaycanın tarixində fərqli səhifəni təmsil edir, lakin bu gün onları birləşdirən əsas anlayış yeni həyatın qurulmasıdır. Xocalıda qayıdışın başlanması, Xankəndidə nəqliyyat layihələrinin həyata keçirilməsi, digər ərazilərdə bərpa və idarəetmə proseslərinin davam etdirilməsi Qarabağın gələcəyinin mərhələli şəkildə formalaşdırıldığını göstərir.
20 Sentyabrın ən böyük mənası da məhz burada ortaya çıxır: bu tarix həm yaddaşdır, həm məsuliyyətdir, həm də gələcəyə baxışdır. Dövlət suverenliyinin bərpası tarixi nəticədirsə, həmin suveren ərazilərdə firavan, təhlükəsiz və müasir həyatın qurulması gələcəyin vəzifəsidir. Azərbaycan bu gün Qarabağda Zəfərdən sonrakı yeni mərhələni yaşayır. 20 Sentyabr tarixdən gələcəyə açılan qapıdır: bir tərəfində Zəfər, digər tərəfində isə quruculuq, Böyük Qayıdış və yeni Azərbaycan dayanır.
Sevda Cabbarova,
YAP Nizami rayon təşkilatının “Babək prospekti, 75” ərazi partiya təşkilatının sədr müavini
