25 Noyabr tarixi Azərbaycan üçün xüsusi mənəvi əhəmiyyət daşıyan günlərdən biridir. Bu gün Kəlbəcər şəhərinin işğaldan azad olunmasının və bölgənin yenidən dövlət suverenliyimizə qaytarılmasının il dönümü kimi qeyd olunur. 2020-ci il 44 günlük Vətən müharibəsində qazanılmış qələbə nəticəsində Ermənistanın kapitulyasiyası ilə Kəlbəcərin bir güllə atılmadan geri alınması Azərbaycan diplomatiyasının, siyasi iradəsinin və hərbi qələbəsinin nadir nümunələrindən biri oldu. Azərbaycanın şanlı ordusu və Prezident İlham Əliyevin qətiyyətli rəhbərliyi sayəsində Kəlbəcər torpaqları uzun illərdən sonra öz doğma sahiblərinə qovuşdu.
Kəlbəcər Azərbaycanın həm coğrafi, həm də strateji baxımdan ən mühüm bölgələrindən biridir. Murov silsiləsi və Tərtər çayı hövzəsi boyunca yerləşən bu şəhər qədim tarixə, zəngin mədəniyyətə və nadir təbii sərvətlərə malikdir. Kəlbəcər həm müalicəvi mineral su mənbələri, həm də təbiətinin əvəzolunmaz gözəlliyi ilə tanınır. İllərlə işğal altında qalsa da, şəhər öz ruhunu, dəyərini və təbiətinin əzəmətini qoruyub saxladı. Azadlıqdan sonra isə bu torpaqlar yeni bir dirçəliş dövrünə qədəm qoydu. Bu gün Kəlbəcərdə geniş miqyaslı quruculuq və bərpa işləri həyata keçirilir. Yeni avtomobil yolları, tunellər, elektrik və qaz xətləri, su infrastrukturu, müasir hərbi postlar, sosial obyektlər sürətlə inşa olunur. Xüsusilə Kəlbəcəri Azərbaycanın digər bölgələri ilə birləşdirən strateji tunellər və yol layihələri bu diyarın gələcək iqtisadi və turizm potensialını daha da gücləndirir.
“Ağıllı kənd” konsepsiyası əsasında salınan yeni yaşayış massivləri, müasir məktəblər, xəstəxanalar və xidmət obyektləri gələcəkdə yüzlərlə ailənin doğma yurduna qayıdışına şərait yaradacaq. Bu proses Kəlbəcərin yaxın illərdə Qarabağın ən dinamik inkişaf edən mərkəzlərindən birinə çevriləcəyini göstərir. Kəlbəcərin bərpası təkcə fiziki infrastrukturun yenilənməsi deyil — həm də mənəvi irsin, tarixi-mədəni yaddaşın bərpasıdır.
Burada yerləşən qədim məbədlər, pirlər, tarixi abidələr, Türk dünyası üçün xüsusi əhəmiyyət daşıyan mədəni dəyərlər yenidən dirçəldilir. Bu torpaqlara qayıdış həm tarixi ədalətin bərpası, həm də milli kimliyimizin, əzmkarlığımızın ifadəsidir. 25 Noyabr – Kəlbəcər Şəhəri Günü xalqımızın birlik, güc və qürur günüdür. Bu gün biz təkcə bir şəhərin azad edilməsini qeyd etmirik, həm də milli iradəmizin, dövlətimizin gücünün, ordumuzun şücaətinin nəticəsini xatırlayırıq. Kəlbəcərin azadlığı Qarabağın bütövlüyünü tamamlayan, Azərbaycanın ərazi toxunulmazlığını bərpa edən tarixi dönüş nöqtələrindən biridir. Bu gün Kəlbəcər yenidən doğulan, inkişaf edən, gələcəyə inamla addımlayan bir Azərbaycan şəhəri kimi yüksəlir. Dirçəlişin rəmzi olan Kəlbəcər xalqımızın yaddaşında hər zaman şərəf və qürurla yaşayacaq.
Orxan Abdullazadə,
Yeni Azərbaycan Partiyası, məsləhətçi
