2026-cı il fevralın 4-də Əbu-Dabidə keçirilən “Zayed İnsan Qardaşlığı Mükafatı”nın təqdimolunma mərasimi təkcə nüfuzlu beynəlxalq tədbir deyildi. Bu mərasim, əslində, müasir dünyanın ən çox ehtiyac duyduğu dəyərlərin – sülhün, dialoqun və qarşılıqlı anlaşmanın rəmzinə çevrildi. Azərbaycan Respublikasının Prezidenti İlham Əliyevin bu tədbirdə səsləndirdiyi fikirlər isə həm regional, həm də qlobal kontekstdə dərin məna daşıyırdı. Prezident İlham Əliyev çıxışında mükafatın adını daşıdığı Şeyx Zayed bin Sultan Al Nahyanın irsinə toxunaraq vurğuladı ki, insan qardaşlığı anlayışı yalnız humanist bir çağırış deyil, dövlətlərarası münasibətlərin real və işlək fəlsəfəsi olmalıdır. Onun fikrincə, bu dəyər sözlərdə deyil, konkret siyasi qərarlarda və cəsarətli addımlarda öz əksini tapmalıdır. Çıxışın əsas xəttini sülh mövzusu təşkil edirdi. Prezident Əliyev uzun illər davam etmiş münaqişə dövründən sonra Cənubi Qafqazda yeni reallıqların formalaşdığını qeyd edərək bildirdi ki, Azərbaycan artıq müharibə sonrası mərhələdə gələcəyə baxmağı, sülh içində yaşamağı və bu sülhü möhkəmləndirməyi prioritet hesab edir. Onun “biz sülh içində yaşamağı öyrənirik” fikri, sadəcə diplomatik ifadə deyil, eyni zamanda tarixi məsuliyyətin dərk edildiyini göstərən bir mesaj idi. Əbu-Dabinin bu mərasim üçün seçilməsi də təsadüfi deyildi.
Prezident İlham Əliyev çıxışında bu şəhərin dialoq və barış üçün mühüm məkana çevrildiyini xüsusi vurğuladı. Məhz burada aparılmış danışıqlar regionda yeni bir mərhələnin əsasını qoymuş, qarşıdurma yerini əməkdaşlıq perspektivlərinə buraxmağa başlamışdır. Bu baxımdan, mükafatın təqdim olunduğu məkanla səsləndirilən fikirlər arasında güclü simvolik bağ yaranırdı. Dövlət başçısı çıxışında tolerantlıq və multikultural dəyərlərə də xüsusi yer ayırdı. Azərbaycan cəmiyyətinin tarixən müxtəlif dinlərin və mədəniyyətlərin birgə yaşadığı məkan olduğunu xatırladan Prezident Əliyev bildirdi ki, bu təcrübə ölkənin daxili həyatında olduğu kimi, xarici siyasətində də əsas istiqamətlərdən biridir. İnsan qardaşlığı anlayışı Azərbaycanın dövlət siyasətində abstrakt ideya deyil, real həyat modelidir. Bu çıxışın ən diqqətçəkən cəhətlərindən biri də onun gələcəyə yönəlik mesajlar verməsi idi. Prezident İlham Əliyev açıq şəkildə göstərdi ki, sülh birdəfəlik əldə olunan nəticə deyil, qorunmalı və inkişaf etdirilməli bir prosesdir.
Qarşılıqlı etimadın qurulması, tarixi stereotiplərin aşılması və dialoqun davamlılığı bu yolun əsas şərtləridir. “Zayed İnsan Qardaşlığı Mükafatı”nın təqdimolunma mərasimində səslənən bu çıxış, əslində, Azərbaycanın regionda oynamaq istədiyi rolu aydın şəkildə ortaya qoydu: münaqişələrdən dərs çıxaran, gələcəyi əməkdaşlıq üzərində qurmağa çalışan və insan amilini siyasi maraqlardan üstün tutan bir dövlət modeli. Prezident İlham Əliyevin Əbu-Dabidə səsləndirdiyi fikirlər sübut etdi ki, insan qardaşlığı yalnız mənəvi ideal deyil, siyasi iradə ilə reallığa çevrilə bilən bir məqsəddir. Bu məqsəd isə müasir dünyanın ən böyük ehtiyaclarından biridir.
Günel Əbdürəhmanova,
Yeni Azərbaycan Partiyası, məsləhətçi
