Azərbaycan və Latviya arasındakı münasibətlər hər zaman qarşılıqlı hörmət və strateji tərəfdaşlıq ruhunda inkişaf edib. Latviya Prezidenti Edqars Rinkeviçsin aprel ayının 22-də Azərbaycana rəsmi səfəri və səfərin yekunlarına dair mətbuata verilən bəyanatlar bu əlaqələrin yeni mərhələyə qədəm qoyduğunun bariz göstəricisidir.
Mətbuata verilən bəyanatlarda hər iki dövlət başçısı ölkələr arasındakı siyasi dialoqun yüksək səviyyədə olduğunu vurğulayaraq Strateji Tərəfdaşlığın təsdiqini bir daha nümayiş etdirirlər. Bu, xüsusilə Avropa İttifaqı (Aİ) kontekstində Azərbaycan üçün böyük əhəmiyyət kəsb edir.
Aİ-Azərbaycan yaxınlaşmasında Latviya Azərbaycanın Aİ ilə münasibətlərinin inkişafında və enerji təhlükəsizliyi məsələlərində Bakının mühüm tərəfdaşı kimi çıxış edir.
Bəyanatlarda ölkələrin suverenlik və ərazi bütövlüyünə xüsusi önəm verilir, beynəlxalq hüququn prinsiplərinə, xüsusilə dövlətlərin suverenliyi və ərazi bütövlüyünə verilən dəstək bir daha bəyan edilir.
Səfərin ən aktual mövzularından biri Azərbaycanın Avropanın enerji xəritəsindəki rolu oldu. Bəyanatın bu hissəsi həm regional, həm də qlobal maraqlara xidmət edir.
Latviya Azərbaycanın Avropaya qaz ixracını artırmasını yüksək qiymətləndirir və bu prosesin Baltikyanı regionun enerji təhlükəsizliyinə müsbət təsirini qeyd edir.
Həmçinin gələcək əməkdaşlıqda prioriteti kimi “yaşıl enerji” dəhlizlərinin yaradılması və Azərbaycanın bərpa olunan enerji potensialının reallaşdırılması məsələləri ön plana çəkilir.
Bəyanatda ticarət dövriyyəsinin artırılması və logistik layihələrin əhəmiyyəti xüsusi yer tutur. Latviya tərəfi Azərbaycanın mərkəzində durduğu nəqliyyat marşrutlarına böyük maraq göstərir. Bu, Baltik dənizi ilə Xəzər dənizi arasında yeni loqistik imkanların yaranması deməkdir.
Azad iqtisadi zonalar və işğaldan azad edilmiş ərazilərdəki bərpa işlərində Latviya şirkətlərinin iştirakı perspektivləri diqqət mərkəzində oldu.
Dövlət başçıları xalqlar arasındakı dostluq bağlarının möhkəmləndirilməsinin vacibliyini qeyd etdilər. Təhsil sahəsində mübadilə proqramları və mədəniyyət günlərinin keçirilməsi bəyanatın mənəvi yükünü təşkil edən amillərdəndir.
Latviya Prezidentinin səfəri və səsləndirilən bəyanatlar sadəcə diplomatik protokol xarakteri daşımır. Bu bəyanatlar Azərbaycanın Cənubi Qafqazda lider dövlət və etibarlı tərəfdaş kimi mövqeyini möhkəmləndirir, Latviyanın Azərbaycan üçün Aİ daxilində dost bir səs olduğunu nümayiş etdirir, iki ölkə arasındakı əməkdaşlığın praktiki nəticələrə (ticarət, enerji, nəqliyyat) əsaslandığını sübut edir.
Bu səfər eyni zamanda post-münaqişə dövründə Azərbaycanın regionda yaratdığı yeni reallıqların Avropa dövlətləri tərəfindən qəbul edilməsi və dəstəklənməsi baxımından mühüm bir diplomatik qələbə hesab oluna bilər.
Tahirli Zaman,
ADİU-nun tələbəsi, Prezident təqüdçüsü, Nizami rayonunun fəal gənci
