Almaniya Federativ Respublikasının Prezidenti Frank-Valter Ştaynmayerin Azərbaycana səfəri çərçivəsində keçirilən görüşlər iki ölkə arasında strateji əməkdaşlığın inkişafı baxımından mühüm əhəmiyyət kəsb etdi. Azərbaycan Respublikasının Prezidenti İlham Əliyevin mətbuata verdiyi bəyanat bu əməkdaşlığın perspektivləri və regional proseslər baxımından diqqətəlayiq məqamları özündə ehtiva edir. Prezident İlham Əliyev bəyanatında vurğuladı ki, Azərbaycan və Almaniya arasındakı münasibətlər qarşılıqlı hörmət və əməkdaşlıq prinsipləri üzərində qurulub. Xüsusilə, enerji təhlükəsizliyi, iqtisadi əməkdaşlıq və yaşıl enerji sahəsində tərəfdaşlıq kimi məsələlər əsas gündəm mövzuları sırasında yer aldı. Almaniya Azərbaycanın Avropaya enerji tədarükündə mühüm tərəfdaşlarından biridir və bu sahədə əməkdaşlığın daha da dərinləşdirilməsi üçün yeni layihələr müzakirə edildi. Görüş zamanı Prezident İlham Əliyev Azərbaycanın regionda sülh və sabitliyə verdiyi töhfələri xüsusi vurğuladı. O, Ermənistanla münasibətlərin normallaşdırılması, post-münaqişə dövründə aparılan bərpa və quruculuq işləri barədə məlumat verdi. Azərbaycanın ərazi bütövlüyünün tam təmin edilməsi və regionda nəqliyyat-kommunikasiya layihələrinin reallaşdırılması istiqamətində atılan addımlar Almaniya Prezidenti ilə müzakirə edilən əsas mövzulardan biri oldu. Prezident İlham Əliyev çıxışında Azərbaycanın yaşıl enerji sahəsində təşəbbüslərini də vurğuladı. Almaniya ilə bu sahədə əməkdaşlıq, xüsusilə, Xəzər dənizində külək enerjisi layihələri və Avropaya yaşıl enerji ixracı imkanları müzakirə olundu. Azərbaycanın COP29-a ev sahibliyi edəcəyini nəzərə alsaq, bu istiqamətdə beynəlxalq tərəfdaşlarla əməkdaşlıq daha da əhəmiyyət kəsb edir. Azərbaycan və Almaniya arasında münasibətlərin inkişafı təkcə iki ölkə üçün deyil, bütövlükdə region üçün mühüm əhəmiyyət daşıyır. Prezident İlham Əliyevin mətbuata verdiyi bəyanat iki ölkə arasında əməkdaşlığın yeni mərhələyə qədəm qoyduğunu və müxtəlif sahələrdə birgə fəaliyyətin genişlənəcəyini göstərir. Bu səfər Azərbaycanın beynəlxalq arenada strateji tərəfdaşlığını gücləndirmək istiqamətində atılan mühüm addımlardan biri kimi qiymətləndirilə bilər.
Günel Əbdürəhmanova,
YAP-ın gənc fəalı
