“Prezident İlham Əliyevin Özbəkistana dövlət səfəri Azərbaycan-Özbəkistan münasibətlərinin yeni keyfiyyət mərhələsinə keçdiyini göstərən mühüm siyasi hadisə kimi qiymətləndirilə bilər. Səfərin proqramına nəzər saldıqda diqqəti çəkən əsas məqam münasibətlərin artıq yalnız diplomatik təmaslarla deyil, institusional mexanizmlər, təhsil, biznes və uzunmüddətli humanitar layihələrlə möhkəmləndirilməsidir”.
Bunu Yeni Azərbaycan Partiyası Nizami rayon təşkilatının sədri Ramil Vəlibəyov deyib.
Ramil Vəlibəyov bildirib ki, Daşkənddə Azərbaycan və Özbəkistan Ali Dövlətlərarası Şurasının III iclasının keçirilməsi bu baxımdan xüsusi əhəmiyyət daşıyır: “Belə bir mexanizmin ardıcıl fəaliyyəti ikitərəfli əlaqələrin ayrı-ayrı təşəbbüslərdən sistemli dövlət siyasətinə çevrildiyini göstərir. Başqa sözlə, Bakı–Daşkənd xəttində əməkdaşlıq artıq yalnız liderlər arasında yüksək siyasi etimada deyil, həmin etimadı davamlı layihələrə çevirən institusional infrastruktura əsaslanır. Səfərin ən diqqətçəkən xüsusiyyətlərindən biri Azərbaycan kapitalının Özbəkistanda müxtəlif sahələr üzrə genişlənməsinin nümayiş etdirilməsi oldu. Bank, tikinti materialları və STEAM məktəblərinin açılması, SOCAR-ın beş yanacaqdoldurma məntəqəsi, “Sea Breeze Uzbekistan”, “Baku City”, mədən sənayesi və meyvə bağları layihələrinin təməlinin qoyulması əməkdaşlığın çoxşaxəli xarakterini ortaya qoydu. Bu mənzərə Azərbaycanın Özbəkistanda yalnız investor deyil, maliyyə, enerji, təhsil, şəhərsalma, sənaye və aqrar sektorları birləşdirən kompleks iqtisadi tərəfdaş kimi mövqeləndiyini göstərir”.
“Digər mühüm istiqamət humanitar diplomatiyadır” – deyən Ramil Vəlibəyov əlavə edib ki, Daşkənddə Nizami Gəncəvi adına Milli Pedaqoji Universitetin açılması Azərbaycan mədəni irsinin müasir təhsil infrastrukturu vasitəsilə beynəlxalq məkana inteqrasiyasının nümunəsidir: “Yeni Daşkənd şəhərində “Azərbaycan” parkının təməlinin qoyulması isə bu siyasətin şəhər və ictimai məkan səviyyəsində davamıdır. Bir sözlə, 23 avqust səfərinin əsas strateji nəticəsi yalnız yeni razılaşmalar deyil. Daha mühüm nəticə Azərbaycan–Özbəkistan münasibətlərinin “siyasi tərəfdaşlıqdan ortaq inkişaf modelinə” keçməsidir. Azərbaycan kapitalı, təhsil modeli, mədəni irsi və milli brendlərinin Özbəkistanın inkişaf mühitində görünən elementlərə çevrilməsi iki ölkə arasında münasibətlərin uzunmüddətli sosial və iqtisadi baza qazandığını göstərir. Bu isə Bakı–Daşkənd xəttini Türk dünyasında praktik inteqrasiyanın ən dinamik nümunələrindən birinə çevirir”.
