Azərbaycan xalqının milli kimliyinin və mənəvi varlığının əsas sütunlarından biri olan Azərbaycan dili, tarix boyu çoxsaylı çətinliklərə baxmayaraq, öz mövqeyini qoruyub saxlamışdır. Xüsusilə sovet dövründə bir çox milli dillərin sıxışdırıldığı bir zamanda, Azərbaycan dilinin rəsmi və hüquqi status qazanması, böyük uzaqgörənlik və siyasi iradə tələb edirdi. Məhz belə bir şəraitdə, 27 aprel 1978-ci il tarixində qəbul edilən Azərbaycan SSR-in yeni Konstitusiyasında Azərbaycan dilinin dövlət dili kimi təsbit olunması, Ulu Öndər Heydər Əliyevin müstəsna xidmətləri sayəsində mümkün olmuşdur. Heydər Əliyev hələ sovet dövründə respublika rəhbəri kimi fəaliyyət göstərərkən, Azərbaycan xalqının milli maraqlarını daim ön planda tutmuş, onun dili, mədəniyyəti, tarixi və mənəviyyatına xüsusi diqqət yetirmişdir. 1978-ci il Konstitusiyasının hazırlanması zamanı Ümummilli Liderin təşəbbüsü və qətiyyəti ilə Azərbaycan dili ilk dəfə olaraq konstitusion səviyyədə dövlət dili statusu aldı. Bu, sadəcə hüquqi bir addım deyil, eyni zamanda milli ruhun qorunması və inkişafı istiqamətində atılmış strateji əhəmiyyətli bir qərar idi. Sovet İttifaqında rus dilinin üstün mövqeyə malik olduğu bir dövrdə belə bir təşəbbüslə çıxış etmək və bunu gerçəkləşdirmək, böyük siyasi cəsarət tələb edirdi. Heydər Əliyevin nüfuzu və iradəsi nəticəsində Azərbaycan dili rəsmi sənədlərdə, dövlət idarəçiliyində və təhsil sistemində geniş şəkildə istifadə olunmağa başlandı. Bu, gələcək nəsillərin ana dillərində təhsil almasına, milli-mənəvi dəyərlərin qorunub saxlanmasına və güclənməsinə geniş imkan yaratdı. Sonralar müstəqil Azərbaycan Respublikasının 1995-ci il Konstitusiyasında da Azərbaycan dili dövlət dili kimi öz əksini tapdı. Bu davamlılıq və hüquqi ardıcıllıq Heydər Əliyevin milli dil siyasətindəki uzaqgörənliyini bir daha təsdiq edir. Nəticə etibarilə, 27 aprel 1978-ci il tarixi yalnız hüquqi sənədin qəbulu deyil, həm də milli özünüdərkin və dilə olan sevginin simvolu kimi yadda qalmışdır. Bu böyük vətənpərvər addım Ulu Öndər Heydər Əliyevin xalqına və dilinə olan dərin hörmət və məhəbbətinin parlaq nümunəsidir.
Məmmədova Nərmin,
Yeni Azərbaycan Partiyası, məsləhətçi
