Hər bir dövlətin uzunmüddətli inkişafı gənc nəslin formalaşma səviyyəsi, dünyagörüşü və vətənə bağlılığı ilə sıx bağlıdır. Azərbaycan dövlətçiliyində bu həqiqəti dərin şəkildə dərk edən böyük şəxsiyyət Ulu Öndər Heydər Əliyev olmuşdur. Onun siyasi fəaliyyətində gənclərlə bağlı məsələlər xüsusi əhəmiyyət kəsb etmiş, gənclər siyasəti dövlət strategiyasının əsas istiqamətlərindən birinə çevrilmişdir. Heydər Əliyev gəncləri cəmiyyətin ən fəal və dinamik təbəqəsi hesab edirdi. O, inanırdı ki, ölkənin sabitliyi və tərəqqisi bilikli, düşüncəli və milli ruhda tərbiyə olunmuş gənclərin mövcudluğundan asılıdır.
Məhz bu baxımdan gənclərin təhsilinə, sosial rifahına, mənəvi inkişafına və ictimai həyatda fəal iştirakına daim xüsusi diqqət yetirilmişdir. Ulu Öndərin gənclər siyasətində təhsilin rolu ön planda dayanırdı. Onun təşəbbüsü ilə təhsil sisteminin inkişafı, ali məktəblərin fəaliyyətinin gücləndirilməsi və gənclərin elmi biliklərə yiyələnməsi üçün mühüm tədbirlər həyata keçirilmişdir. İstedadlı gənclərin aşkar olunması və onların potensialının reallaşdırılması dövlətin əsas vəzifələrindən biri kimi müəyyən edilmişdir.
Bununla yanaşı, gənclərin xarici ölkələrdə təhsil alaraq qabaqcıl təcrübə qazanması və həmin bilikləri ölkənin inkişafına yönəltməsi təşviq olunmuşdur. Heydər Əliyev gənclərin vətənpərvərlik ruhunda formalaşmasına xüsusi önəm verirdi. Onun fikrincə, milli-mənəvi dəyərlərə bağlılıq, dövlətçilik ənənələrinə hörmət və Vətənə sədaqət gənc nəslin əsas keyfiyyətləri olmalıdır. Bu məqsədlə gənclərin tariximizə, mədəni irsimizə və ana dilimizə bağlılığını gücləndirən ardıcıl tədbirlər həyata keçirilmişdir. Gənclərin sağlam və hərtərəfli inkişafı da Ulu Öndərin diqqət mərkəzində olmuşdur. İdmanın inkişaf etdirilməsi, sağlam həyat tərzinin təbliği və gənclərin asudə vaxtının səmərəli təşkili dövlət siyasətinin mühüm tərkib hissəsinə çevrilmişdir. Bu istiqamətdə görülən işlər gənclərin həm fiziki, həm də mənəvi baxımdan sağlam yetişməsinə müsbət təsir göstərmişdir. 1996-cı ildə keçirilmiş Azərbaycan Gənclərinin I Forumu ölkədə gənclər siyasətinin yeni mərhələyə qədəm qoyduğunu nümayiş etdirmişdir.
Bu forum gənclərin problemlərinin açıq şəkildə səsləndirildiyi, onların fikir və təkliflərinin dövlət səviyyəsində dinlənildiyi əhəmiyyətli bir platforma olmuşdur. Forumun nəticəsi olaraq 2 Fevral tarixinin Azərbaycan Gəncləri Günü kimi təsis edilməsi gənclərə göstərilən diqqət və etimadın rəsmi ifadəsinə çevrilmişdir. Bu gün Ulu Öndər Heydər Əliyevin müəyyən etdiyi gənclər siyasəti uğurla davam etdirilir. Prezident İlham Əliyevin rəhbərliyi altında həyata keçirilən dövlət proqramları və layihələr gənclərin bilik və bacarıqlarının artırılmasına, onların cəmiyyətin bütün sahələrində fəal iştirakına şərait yaradır. Azərbaycan gəncliyi bu gün beynəlxalq tədbirlərdə, elm, mədəniyyət və idman sahələrində ölkəmizi layiqincə təmsil edir. Ulu Öndər Heydər Əliyevin gənclər siyasəti Azərbaycanın gələcəyinə hesablanmış düşünülmüş və məqsədyönlü bir strategiya olmuşdur. Bu siyasət nəticəsində formalaşan gənc nəsil müstəqil Azərbaycan dövlətinin möhkəmlənməsində və inkişafında mühüm rol oynayır. 2 Fevral – Azərbaycan Gəncləri Günü isə bu qayğının, etimadın və böyük gələcəyə olan inamın rəmzidir.
Zeynalov Murad,
Yeni Azərbaycan Partiyası, məsləhətçi
