Bu gün biz Azərbaycan tarixinin ən faciəli və eyni zamanda ən həssas səhifələrindən birini – Xocalı soyqırımını anırıq. 1992-ci ilin 26 fevral gecəsi baş verən bu qanlı hadisə təkcə bir şəhərin işğalı deyil, mülki əhaliyə qarşı planlı və amansız qətliam idi.
Xocalıda yüzlərlə günahsız insan – qadınlar, uşaqlar, qocalar – xüsusi qəddarlıqla qətlə yetirildi, ailələr tamamilə məhv edildi, insanlar əsir götürüldü, ağır işgəncələrə məruz qaldı. Bu faciə beynəlxalq humanitar hüququn, insan haqlarının və müharibə qanunlarının kobud şəkildə pozulmasının açıq nümunəsi idi. Xocalı yalnız Azərbaycan xalqına qarşı deyil, bütövlükdə insanlığa qarşı törədilmiş cinayət kimi tarixə düşdü.
Bu hadisə həm də siyasi baxımdan böyük sınaq idi. O dövrdə regionda mürəkkəb geosiyasi proseslər gedirdi və Azərbaycan həm daxili çətinliklərlə, həm də xarici təzyiqlərlə üz-üzə idi. Təəssüf ki, beynəlxalq ictimaiyyətin susqunluğu və ikili standartları Xocalı faciəsinin uzun müddət lazımi hüquqi-siyasi qiymət almamasına səbəb oldu.
Lakin Azərbaycan dövləti və cəmiyyəti bu həqiqətlərin unudulmaması üçün sistemli və ardıcıl fəaliyyət göstərdi.
Son illərdə aparılan məqsədyönlü siyasət nəticəsində Xocalı həqiqətləri dünya miqyasında daha geniş tanıdıldı, bir sıra ölkələr və beynəlxalq təşkilatlar bu faciəni soyqırımı kimi qəbul etdilər. Bu, həm tarixi ədalətin bərpası istiqamətində atılmış addım, həm də Azərbaycanın siyasi iradəsinin göstəricisidir.
Xocalı bizim üçün sadəcə bir tarix deyil. Bu, milli yaddaşımızdır. Bu, dövlətçilik məsuliyyətidir. Bu, gələcək nəsillərə ötürüləcək həqiqətdir. Xocalı bizə öyrətdi ki, güclü dövlət, milli birlik və siyasi qətiyyət xalqın təhlükəsizliyinin əsas təminatıdır. Bu faciə həm də Azərbaycan xalqının sarsılmaz ruhunu, ədalətə inamını və mübarizə əzmini daha da möhkəmləndirdi.
Bu gün sosial şəbəkələrdə paylaşım etmək, məqalələr yazmaq sadəcə informasiya yaymaq deyil. Bu, haqq səsimizi dünyaya çatdırmaqdır. Bu, şəhidlərin xatirəsinə ehtiramdır. Bu, gələcək nəsillərə “unutmadıq və unutdurmayacağıq” mesajıdır.
Xocalı qurbanlarının xatirəsi hər zaman qəlbimizdə yaşayacaq.
Allah bütün şəhidlərimizə rəhmət eləsin.
Xocalını unutma!
Səbinə Həsənova,
YAP-ın fəalı
