Prezident İlham Əliyevin irəli sürdüyü qlobal iqtisadi təşəbbüslər Naxçıvan Muxtar Respublikasını bərpaolunan enerjinin mərkəzinə çevirməkdədir. Qarabağ və Şərqi Zəngəzur kimi, Naxçıvan da dövlət başçısı tərəfindən rəsmi olaraq “yaşıl enerji zonası” elan edilmişdir. Bu gün muxtar respublikada istehsal olunan elektrik enerjisinin əksəriyyəti məhz bərpaolunan enerji mənbələrinin payına düşür. Ölkə rəhbərliyinin bu uzaqgörən siyasəti Naxçıvanı qlobal iqlim dəyişiklikləri ilə mübarizədə nümunəvi bir region kimi beynəlxalq arenaya çıxarır.
Naxçıvanın ekoloji təmiz enerji istehsalı üzrə potensialı Azərbaycanın digər bölgələri ilə müqayisədə ən yüksək göstəricilərə malikdir. Prezident İlham Əliyevin birbaşa tapşırığı ilə aparılan dəqiq təhlillər və monitorinqlər təsdiq edir ki, Günəş elektrik enerjisinin istehsalı üçün ölkə ərazisində ən əlverişli məkan məhz Naxçıvandır. Dövlət başçısı səfər çərçivəsində 50 meqavat gücündə iki Günəş elektrik stansiyasının tikintisi ilə şəxsən tanış olmuşdur. Növbəti mərhələdə isə 600 hektardan çox ərazidə yüzlərlə meqavat gücündə yeni Günəş elektrik stansiyalarının inşa edilməsi planlaşdırılır.
Bərpaolunan enerjinin ən mühüm texniki problemi olan kəsintilərin və asimmetriyanın qarşısını almaq üçün nəhəng saxlanc infrastrukturunun qurulması qaçılmazdır. Prezident İlham Əliyev Azərbaycanda artıq 250 meqavatlıq iki batareya saxlanc qurğusunun yaradıldığını nəzərə alaraq, Naxçıvanda da oxşar infrastrukturun qurulması barədə qərar qəbul etmişdir. Dövlət başçısının xüsusi göstərişinə əsasən, birinci mərhələdə burada ən azı 100 meqavatlıq batareya saxlanc qurğusu inşa olunacaqdır. Bu müasir texnologiyalar Günəş və su elektrik stansiyalarından əldə edilən enerjini yığaraq şəbəkənin fasiləsizliyini sığortalayacaqdır.
Eyni zamanda, su enerjisi ehtiyatlarından maksimum səmərəli istifadə Prezident İlham Əliyevin enerji doktrinasının vacib elementidir. Ordubad rayonunun Tivi kəndində layihələndirilən 15 meqavatdan bir qədər çox gücdə su elektrik stansiyasının inşası üçün dövlət büdcəsindən əlavə vəsaitlərin ayrılması qərara alınmışdır. Həm yerli, həm də xarici investorların böyük maraq göstərdiyi bu yaşıl enerji layihələri, muxtar respublikanın iqtisadiyyatını tam sığortalayaraq onu güclü bir ixrac mərkəzinə çevirəcəkdir.
Lətifə Nəsirova,
YAP Nizami rayon təşkilatının “Keşlə qəsəbəsi, Sabir küçəsi, 61” ərazi partiya təşkilatının sədr müavini
