Azərbaycan xalqı tarix boyu azad yaşamaq, öz taleyini müəyyən etmək və müstəqil dövlət qurmaq uğrunda mübarizə aparmışdır. Üçrəngli Dövlət Bayrağımız bu arzuların və mübarizənin ən parlaq rəmzidir. Bayrağımızın hər bir rəngi xalqımızın milli kimliyini və müstəqillik ideallarını özündə birləşdirir.
1918-ci ildə Azərbaycan Xalq Cümhuriyyətinin yaradılması xalqımızın azadlıq mübarizəsində tarixi mərhələ oldu. Cümhuriyyətin üçrəngli bayrağı qəbul etməsi müstəqil dövlətin milli simvolunu müəyyənləşdirdi. Həmin qərar xalqımızın siyasi iradəsini və öz dövlətini qurmaq əzmini dünyaya nümayiş etdirdi.
Cümhuriyyətin süqutundan sonra müstəqillik ideyası xalqımızın yaddaşında yaşamaqda davam etdi. Sovet dövrünün çətinliklərinə baxmayaraq, milli kimlik və azadlıq düşüncəsi qorundu. 1990-cı ildə Naxçıvanda üçrəngli bayrağın yenidən qəbul edilməsi bu ideyanın dövlət səviyyəsində bərpası oldu.
1991-ci ildə Azərbaycanın dövlət müstəqilliyinin bərpası ilə üçrəngli bayrağımız yenidən müstəqil dövlətimizin əsas atributlarından birinə çevrildi. Dövlət rəmzlərinin hüquqi əsaslarının möhkəmləndirilməsi və cəmiyyətdə onlara hörmət ruhunun formalaşdırılması müstəqil dövlət quruculuğunun vacib istiqamətlərindən oldu.
Bu gün bayrağımız xalqımızın azadlıq və müstəqillik iradəsini təmsil edir. Onu qorumaq və uca tutmaq hər bir vətəndaşın borcudur. Azərbaycan müstəqil dövlət kimi inkişaf etdikcə üçrəngli bayrağımız da daim qürurla dalğalanacaqdır.
Şəbnəm Quliyeva,
YAP Nizami rayon təşkilatının fəalı
