Füzuli Şəhəri Günü: Tarixi Zəfərdən Böyük Qayıdışa
17 oktyabr Füzuli Şəhəri Günü Azərbaycan xalqının yaddaşında tarixi qələbənin, milli iradənin və doğma torpaqlara qayıdış əzminin rəmzi kimi xüsusi yer tutur. Bu əlamətdar gün Füzulinin işğaldan azad edilməsinin tarixi əhəmiyyətini bir daha xatırladır, xalqımızın ərazi bütövlüyünün bərpası istiqamətində qazandığı uğurların dəyərini nümayiş etdirir.
Füzuli şəhəri 1993-cü ildə Ermənistan silahlı qüvvələri tərəfindən işğal edilmiş, uzun illər ərzində şəhərin infrastrukturu dağıdılmış, yaşayış məntəqələri xarabalığa çevrilmişdi. Buna baxmayaraq, füzulililərin doğma yurda qayıtmaq ümidi heç vaxt sönmədi. 2020-ci il sentyabrın 27-də başlayan Vətən müharibəsi Azərbaycanın hərbi-siyasi gücünü və xalqın birliyini nümayiş etdirdi. Oktyabrın 17-də Füzuli şəhərinin azad olunması müharibənin mühüm mərhələlərindən biri kimi tarixə düşdü.
Bu qələbə Azərbaycan Ordusunun qəhrəmanlığının, əsgər və zabitlərimizin fədakarlığının, şəhidlərimizin müqəddəs xatirəsinin təcəssümüdür. Prezident, Müzəffər Ali Baş Komandan İlham Əliyevin rəhbərliyi ilə əldə olunan tarixi Zəfər ölkəmizin suverenliyinin və ərazi bütövlüyünün bərpası yolunda həlledici rol oynadı. Füzulinin azadlığı yalnız hərbi uğur deyil, həm də onilliklər ərzində doğma torpaqlarından ayrı düşmüş insanların qayıdışına açılan yol oldu.
Bu gün Füzulidə həyata keçirilən genişmiqyaslı bərpa və quruculuq işləri şəhərin gələcək inkişafı üçün möhkəm təməl yaradır. Müasir yaşayış məhəllələrinin, yolların, sosial obyektlərin və digər infrastruktur layihələrinin yaradılması Böyük Qayıdış prosesinin mühüm tərkib hissəsidir. Füzuli Beynəlxalq Hava Limanının istifadəyə verilməsi isə Qarabağın nəqliyyat imkanlarını genişləndirərək bölgənin iqtisadi və turizm potensialının inkişafına şərait yaradır.
Füzuli Şəhəri Günü həm də gələcəyə inamın, milli həmrəyliyin və quruculuq əzminin təntənəsidir. Doğma yurda qayıdan sakinlərin təhlükəsiz, firavan və davamlı yaşayışının təmin edilməsi dövlət siyasətinin əsas istiqamətlərindəndir. Füzulinin yenidən dirçəlməsi Azərbaycanın gücünü, xalqımızın sarsılmaz iradəsini və tarixi torpaqlarına bağlılığını nümayiş etdirir. Bu əlamətdar tarix gələcək nəsillərə azadlığın, birliyin və Vətən sevgisinin əsl dəyərini aşılayır.
Aynur Mehdiyeva,
YAP Nizami rayon təşkilatının məsləhətçisi
