Doğma yurda qayıdışın tam mənası yalnız ailələrin mənzillə təmin olunması ilə tamamlanmır. Qayıdan insanların gündəlik həyatının bütün əsas sahələrinin bərpası, xüsusilə uşaqların təhsil imkanlarının təmin edilməsi Böyük Qayıdışın mühüm sosial istiqamətidir.
Cəbrayıl şəhərində Mehdi Mehdizadə adına tam orta məktəbin istifadəyə verilməsi bu baxımdan mühüm hadisədir. Rəsmi məlumatlarda məktəbin yeni yaşayış məkanında qayıdan ailələrin uşaqlarının təhsil ehtiyaclarını qarşılamaq məqsədilə istifadəyə verildiyi qeyd olunur.
Məktəbin yaradılması yalnız təhsil binasının tikilməsi kimi qiymətləndirilə bilməz. Məktəb yeni sosial mühitin formalaşdığı əsas ictimai məkanlardan biridir. Burada uşaqlar təhsil almaqla yanaşı, yeni Cəbrayılın ictimai həyatının iştirakçılarına çevrilirlər.
Təhsilin digər mühüm funksiyası tarixi yaddaşın qorunmasıdır. Cəbrayılın keçmişi, işğal dövrünün nəticələri, 2020-ci ilin hadisələri və sonrakı bərpa prosesi yeni nəslin tarixi şüurunun formalaşmasında mühüm mövzulardır.
Beləliklə, Cəbrayıl məktəbi Böyük Qayıdışın sosial nəticələrindən birini simvolizə edir. Şəhərin yenidən qurulması ilə yanaşı, burada yeni nəsil yetişir və təhsil sistemi həmin nəslin sosial, intellektual və vətəndaşlıq inkişafının əsas institutlarından birinə çevrilir.
Əminə Kərimova,
YAP Nizami rayon təşkilatının “Nəsimi küçəsi, 34” ərazi partiya təşkilatının sədri
