Şuşa – Zəfərimizin strateji və mənəvi açarı
Qarabağın coğrafi və tarixi baxımdan mühüm mövqeyində yerləşən Şuşa hər zaman strateji əhəmiyyətə malik olub. Şəhərin yüksəklikdə yerləşməsi, ətraf ərazilərə nəzarət imkanları və tarixi mövqeyi onu Qarabağın ən mühüm yaşayış məntəqələrindən birinə çevirib. Buna görə də Şuşanın azad edilməsi Vətən müharibəsində xüsusi əhəmiyyət daşıyırdı.
2020-ci il noyabrın 8-də Azərbaycan Ordusunun Şuşanı azad etməsi hərbi baxımdan müharibənin gedişinə həlledici təsir göstərdi. Şəhərin mürəkkəb relyefi və düşmənin müdafiə mövqeləri əməliyyatın çətinliyini artırsa da, Azərbaycan hərbçilərinin peşəkarlığı bu maneələri aradan qaldırdı. Şuşa əməliyyatı düzgün planlaşdırılmış hərbi strategiyanın və yüksək döyüş hazırlığının nəticəsi oldu.
Şuşanın strateji əhəmiyyəti ilə yanaşı, onun mənəvi dəyəri də əvəzsizdir. Azərbaycan xalqı üçün bu şəhər muğamın, poeziyanın, musiqinin, incəsənətin və milli yaddaşın beşiyidir. Şuşanın azad edilməsi xalqımızın tarixi ədalətin bərpasına olan inamını möhkəmləndirdi və milli qürur hissini daha da yüksəltdi.
Müzəffər Ali Baş Komandan İlham Əliyevin rəhbərliyi ilə qazanılan bu qələbə Azərbaycan dövlətinin hərbi və siyasi qüdrətinin nümayişi oldu. Dövlət başçısının Şuşaya xüsusi diqqəti şəhərin azadlıqdan sonrakı inkişaf mərhələsində də özünü göstərir. Şuşada həyata keçirilən layihələr şəhərin strateji mövqeyinin möhkəmləndirilməsinə və onun regional əhəmiyyətinin artırılmasına xidmət edir.
Bu gün Şuşa həm Azərbaycanın suverenliyinin, həm də milli-mədəni dirçəlişinin rəmzidir. Şəhərin azad olunması ilə xalqımız öz tarixi irsinə qovuşdu. Şuşa Şəhəri Günü hər bir azərbaycanlı üçün dövlətimizin gücünü, ordumuzun qəhrəmanlığını və milli iradəmizin sarsılmazlığını xatırladan əlamətdar tarixdir.
Bahadur Şahverdiyev,
YAP Nizami rayon təşkilatının “Oqtay Vəliyev küçəsi, 72 ” ərazi partiya təşkilatının sədri
